काठमाडौ, बैशाख २८ | राष्ट्रिय परीक्षा बोर्ड (NEB) ले माध्यमिक शिक्षा परीक्षा (SEE) २०८२ को नतिजा सार्वजनिक गरेको छ। यस वर्ष करिब ६५.९८ प्रतिशत विद्यार्थी उत्तीर्ण भएका छन् भने १ लाख ४६ हजारभन्दा बढी विद्यार्थी नन–ग्रेडेड भएका छन्।
नतिजा सार्वजनिक भएसँगै देशभरका विद्यार्थी तथा अभिभावकमा उत्साह र चासो बढेको छ। बोर्डका अनुसार विद्यार्थीहरूले वेबसाइट, एसएमएस तथा आइभीआर प्रणालीमार्फत आफ्नो नतिजा हेर्न सक्ने व्यवस्था गरिएको छ।
विद्यार्थीहरूले नेपाल टेलिकमको आधिकारिक वेबसाइटमार्फत आफ्नो सिम्बोल नम्बर राखेर नतिजा हेर्न सक्नेछन्। साथै मोबाइलबाट “SEE <space> Symbol Number” टाइप गरी १६०० मा SMS पठाएर पनि नतिजा प्राप्त गर्न सकिने जनाइएको छ।
नतिजा सार्वजनिक भएसँगै वेबसाइटहरूमा अत्यधिक ट्राफिकका कारण केही समय प्राविधिक समस्या समेत देखिएको थियो। त्यसपछि परीक्षा नियन्त्रण कार्यालयले विद्यार्थीलाई धैर्य गर्न र आधिकारिक पोर्टलहरू मात्र प्रयोग गर्न आग्रह गरेको छ।
यस वर्ष पनि “NG” प्राप्त गर्ने विद्यार्थीको संख्या उल्लेख्य रहेको छ। शिक्षा विज्ञहरूले विद्यालयस्तरको सिकाइ गुणस्तर, शिक्षक अभाव, कमजोर आधारभूत शिक्षा तथा परीक्षा प्रणाली सुधारको आवश्यकता औंल्याएका छन्। पछिल्लो समय सामुदायिक विद्यालयको कमजोर शैक्षिक अवस्थाबारे विभिन्न अध्ययनहरूले समेत चिन्ता व्यक्त गरेका छन्।
बोर्डले दुई विषयसम्म NG प्राप्त गर्ने विद्यार्थीका लागि छिट्टै ग्रेडवृद्धि (Supplementary) परीक्षा सञ्चालन गर्ने तयारी भइरहेको जनाएको छ। दुईभन्दा बढी विषयमा NG आउने विद्यार्थीले भने आगामी वर्ष पुनः नियमित परीक्षा दिनुपर्ने व्यवस्था रहेको छ।
