काठमाडौ, ५ जेष्ठ । सर्वोच्च अदालतका न्यायाधीश डा. मनोजकुमार शर्मा नेपालको नयाँ प्रधानन्यायाधीशमा नियुक्त भएका छन्। संसदीय सुनुवाइ समितिबाट अनुमोदन भएपछि राष्ट्रपति रामचन्द्र पौडेलले मंगलबार उनलाई पद तथा गोपनीयताको शपथ गराएका हुन्। शपथपछि शर्माले सर्वोच्च अदालत पुगेर औपचारिक रूपमा पदभार ग्रहण गरेका छन्।
संवैधानिक परिषद्को सिफारिसअनुसार सर्वोच्च अदालतका न्यायाधीशहरूमध्ये चौथो वरीयतामा रहेका शर्मालाई प्रधानन्यायाधीशमा नियुक्त गरिएको हो। वरिष्ठताको परम्परा तोड्दै गरिएको यस नियुक्तिलाई लिएर न्यायिक तथा राजनीतिक वृत्तमा विभिन्न बहस सुरु भएको छ। वरिष्ठतम् न्यायाधीश सपना प्रधान मल्लको नाम चर्चामा रहे पनि चौथो वरीयताका न्यायाधीशलाई अघि सारिएको विषयले कानुनी क्षेत्रको ध्यान आकर्षित गरेको छ।
यसैबीच, विकसित न्यायिक घटनाक्रमबारे आधिकारिक धारणा सार्वजनिक गर्न नेपाल बार एसोसिएसनले आकस्मिक बैठक आह्वान गरेको छ। बारले न्यायपालिका र संसदबीच देखिएको संवेदनशील परिस्थितिलाई ध्यानमा राख्दै गम्भीर छलफल आवश्यक रहेको जनाएको छ।
नवनियुक्त प्रधानन्यायाधीश शर्मासमक्ष सर्वोच्च अदालतमा थुप्रिएका मुद्दाको व्यवस्थापन, न्यायिक सुधार, अदालतभित्रको ढिलासुस्ती अन्त्य तथा न्यायप्रणालीप्रतिको जनविश्वास पुनःस्थापना गर्ने प्रमुख चुनौती रहेका छन्।
