काठमाडौँ | संघीय मामिला तथा सामान्य प्रशासन मन्त्री राजकुमार गुप्ताले पदबाट राजीनामा दिएका छन्। उनलाई घुस लेनदेनको अडियो सार्वजनिक भएपछि चौतर्फी आलोचना र प्रधानमन्त्रीको निर्देशनले राजीनामातर्फ डोर्याएको हो।
सामाजिक सञ्जालमा भाइरल भएको अडियोमा मन्त्री गुप्ताले कास्की जिल्ला मालपोत कार्यालयका प्रमुखको सरुवा रोक्न रु ५३ लाख र भूमिआयोग सम्बन्धी नियुक्तिका लागि थप रु २५ लाख माग गरेको आशंका गरिएको छ। अडियोमा सुनिएको स्वर मन्त्रीकै भएको दाबी गर्दै जनसाधारणदेखि राजनीतिक वृत्तसम्म चर्को विरोध भएको थियो।
श्रोतहरुलाई उल्लेख गर्दै आएका समाचारहरु अनुसार अडियो सार्वजनिक भएपछि प्रधानमन्त्री केपी शर्मा ओलीले सोमबार बिहानै मन्त्री गुप्तालाई बालुवाटार बोलाएर स्पष्टीकरण मागेका थिए। सोही छलफलपछि उनले प्रधानमन्त्री कार्यालयमा आफ्नो राजीनामा पत्र बुझाएका हुन्। यद्यपि, प्रधानमन्त्री व्यस्त रहेका कारण उनको राजीनामा सिधै हस्तान्तरण नगरेर सचिवालयमार्फत् बुझाइएको स्रोतले जनाएको छ।
मन्त्री गुप्ताको प्रतिक्रिया
राजीनामा बुझाइसकेपछि सामाजिक सञ्जालमार्फत विज्ञप्ति जारी गर्दै गुप्ताले आफूमाथि लगाइएको आरोप मनगढन्ते भएको दाबी गरे। उनले लेखेका छन्,
“कहिलेकाहीँ नखाएको विषले पनि असर गर्छ। म प्रविधिको दुरुपयोगको शिकार भएको छु। सत्य प्रमाणित होस् भन्ने चाहनाले पदबाट अलग भएको छु।”
तर सार्वजनिक चासो र प्रतिपक्षी दलहरूको तीव्र दबाबका बीच गुप्ताको यो दाबीले खासै विश्वास पाउन सकेन।
चुलिँदो राजनीतिक दबाब
घटना सार्वजनिक भएसँगै विपक्षी दलहरू—जस्तै जनता समाजवादी पार्टी, राप्रपा र कांग्रेसले मन्त्री गुप्ताविरुद्ध कडा कारबाहीको माग गरेका थिए। संसदमा समेत ‘भ्रष्टाचारलाई संरक्षण गर्ने मन्त्रीहरू’ पदमा बस्न नमिल्ने भन्दै प्रश्न उठाइएको थियो। सत्तारूढ दल नेकपा एमाले भित्र समेत गुप्ताको राजीनामा माग गर्दै असन्तोष व्यक्त गरिएको थियो। पार्टी भित्रैबाट राजीनामाको माग उठेपछि प्रधानमन्त्री ओलीमाथि पनि निर्णय लिन दबाब परेको थियो।
